CIG BBVA: Por unha banca ao servizo da sociedade

O BBVA vai poñer en marcha o día 22 deste mes, na oficina de Montero Ríos en Compostela, un plan piloto para forzar a desaparición dos servizos da xanela de caixa nas oficinas, eliminando as operacións en efectivo. Unha medida que prexudicará a gran parte da clientela, nomeadamente ás persoas con maior idade que non forman parte da suposta «modernidade dixital» que o banco pretende potenciar.

Pero, ademais, con esta decisión o banco ponse na primeira liña da política que seguen todas as entidades: se prospera, seguirano outras. Pretenden deixar de dar servizo á clientela para converter os centros de traballo en oficinas de colocación de produtos financeiros que a clientela non demanda, recruando as presións e o acoso ao persoal, mediante a imposición de obxectivos de vendas leoninos.

Reivindicamos o mantemento dos postos de traballo que o banco pretende extinguir con esta medida, o servizo de efectivo nas entidades ten unha gran demanda; pretender eliminalo prexudica ao emprego, pero tamén á clientela e á sociedade no seu conxunto. Xa está ben dos abusos da gran banca e das axudas públicas directas e indirectas. Os traballadores e as traballadoras temos vocación de servizo á sociedade e rexeitamos o modelo bancario baseado no abuso e espolio da clientela.